شعر حسن اوموداوغلو
ساليب توز آياغينا بير نئچه باليق دنيزي ترك ائتدي او «لوو» لو اللر
دنيز هاراي چكدي باليقلار اوچون دالغالي ساچيني يولدو آنا تك
بير آزدان باغيرتي چكيب آغلادي آنا آرخاسينا باخان بالا تك
دنيز هارايينا چاتمادي بير «هو» سانكي قورد يئميشدي شنگلي سيني
تپه گؤز اللري قان_قان دئيه رك آپارميشدي اونون سئوگيليسيني
سئوگيلي باليقلار چاليشدي مودام قورتولوش اولمادي قييناقدان
دوستاق باليقلارين پوزقون حالينا گؤيلر قان آغلادي قيزيل شافاقدان
سن سولار باغريندا چاخناشان باليق آيريلدي قوينوندان بوللور دنيزين
فلكه ال_بير اولاراق سارالتدي باليغين گوموش بنيزين
بير نئچه قارا گون اؤتوب كئچديكده ساتاغا يوللاندي دوستاق باليقلار
آلينيب ساتيلدي سانكي بير ماتاح دنيزين گؤزوندن اوزاق باليقلار
شوشه قفسلري سوسلمك اوچون مرمر سارايلارا گئتدي باليقلار
كيمي سي ال اوزوب آنا دنيزدن كيمي سي اوزوندن_ايتدي باليقلار
لاكين شيمشك باليق دايانماياراق دنيز هوسينده آليشدي آنجاق
باليقلار دنيزه گركدير دئيه شوشه قفسينده چاليشدي آنجاق
او دنيز ائولادي دلي باليقدير او دئييل بير چيمديك يئمك باليغي
مگر سيغينارمي شوشه قفسه ايپك دنيزلرين شيمشك باليغي
باليغا ديكيلن سويوق باخيشلار آل_الوان رنگينه آلقيش دئييردي
باليق ايكي اوزلو شوشه يه مودام اوركده ابدي قارقيش دئييردي
باخيردي آينالي قورخونج گوزلره كيرپيك لر بارماقليق بيلكلر زندان
گؤره ركن شكليني قارا گوزگوده چيرپينيب قورتولوش ايستيردي هر آن
چرپينان باليغين گوموش گؤوده سين بيچيب يارالادي شوشه قفسي
قانلي بير گرديه دؤنموشدو يئري چرپينيب چاغلادي واركن نفسي
دئدي قوي بويانسين قانيما سولار! اوركده قالماسين آرزيم، هاراييم
چايلارين قوينوندا دنيزه قدر چاتاجاقدير منيم حورريييت حاييم
بو گون من اؤلسمده ياشاسين دنيز قان_قيرميز اؤلومو آلقيشلاييرام
ذيللتله ياشاماق نه يه گركدير؟ بئله بير حياتي قارقيشلاييرام
چاليشيب دالغايا گتيردي سويو چاغلاييب صبرينين چاناغي داشدي
«باليق سودا اؤلسه ميرداردير» دئيه شوشه دوواريندان غئيرتله آشدي
چاليشيب حورريييت ديلك يولوندا دنيز سئوگيسيله قان وئردي باليق
خالينين آل_قيرميز بير بوداغيندا سانكي ناخيش اولوب جاي وئردي باليق
او قوزغو باخيشلي قورغوشون اللر ايلغيم گؤگله سيني باليغا سالدي
باليغي آتاركن آرخين سويونا سولار ائولاديني قوينونا آلدي
«موشتولوق وئرمييه» اوچوب قاغايي «گؤز آيدين»دئمه يه گليردي آغلار
«باش ساغليق» وئرمه يه چايلار تله سيب قار كؤينه ييني گئيميشدي داغلار
يوللار اوزانيردي شيرين يوخو تك آنجاق دايانمادي هفته لر آيلار
گتيريب چيخارتدي آنا دنيزه دالغا تابوتوندا باليغي چايلار
باسيب اؤز باغرينا يورقون بالاسين هؤنكوروب چاغلاييب آغلادي دنيز
بولودلو گؤيلري درده گتيريب يانيقلي اوره يين داغلادي دنيز
گؤيلرسه پوسكوروب وولقانلار كيمي بولودلارشيمشكلر گورشاد چاغلادي
بو گئجه صبحه تك ياغيش يئرينه گؤيلر دنيز اوچون باليق آغلادي
بؤلوم : ادبييات
یازار : alper